إزاى هانصوم قولِّى ياخينا
وإحنا محاوطانا بلاوينا
لازم التوبة ويَّا صيامنا
علشان ربنا يرضى علينا
إزاى هاتصوم وإنته سيجارتك
آذى بيها جارك مع جارتك
غالباك وبتعصى بيها ربك
بطلها ورينا شطارتك
ولا السهرة بدال ماقيام
بتقضيها قال فى خِيام
وتشيِّش وتزوِّد ذنبك
ومراتك بتشيش جنبك
والآخر تدفع إيشى كام
لأ بأه ... فوق ياخى مالأوهام
وإنته تعالى شوية إستنى
ياللى كَدبك آذى وِدانّا
داخل إزاى رمضان وبتكدب
توب بأه يلا عشان تتهنى
وإنته ياخويا ياقاطِع أهلك
ورحمك مشتاقة بتندهلَك
إلحق صلح حالك زورهم
أحسن كده شكلك راح تَهْلَك
وإنتى ياشابة يلا قوليلى
صايمة إزاى وإنتى بتميلى
وهدومك عمالة تحَزّق
والبادى على جسمك بيلزق
وبتقولى هاضيق بناطيلى
وإنتى يام لسان تعبان
بيعض فلانة وفلان
لا ... ماينفعش الغيبة ياحلوة
لا فى رمضان ولا غير رمضان
نفسى يبقى صيامنا حقيقى
مش أصوم وأعطش ينشف ريقى
وأنا ذنبى مضيعلى فى أجرى
زى حجر واقف فى طريقى
يلا نجدد نية نتوب
نبعد بأه عن أى ذنوب
يغفر لينا بفضله المولى
وإحنا برحمة ربنا أولى
وربنا دايما رب قلوب
*****
اللهم تقبل منا صالح الأعمال وإجعلها خالصة لوجهك وأنفعنا وأنفع بنا وإجعلنا ممن تعرض لنفحاتك فنال رضاك يارب ... آمين!
السبت 5 سبتمبر 2009 - 5:09 من طرف زهرةالربيع
موضوع: إزاى هانصوم ...قولى ياخينا؟ 