هل الهـــلال
هل الهلال والشهر لاح
والفرح جه والحزن راح
واتفتـّحِت كل القلوب
تِستقبله بشوق وانشراح
..........................
بَدَأ الشيطان في المسكنه
علشان قرار مِن ربنا
إنه يكِنْ وينحِبس
في السجن ضهره ينحَنىَ
.......................
في المسجد اللي جنبنا
هنروح نصلي كلنا
واما الأدان هيقول قيام
نلقى السجود ملا حيِّنا
......................
والخير يعُّم على الجيران
أن كان فقير أو كان جعان
يفرح بنعمة ربنا
اللي كاتِبها من زمان
......................
بس اما اشوف ناس فطرانين
مِش معذورين ولا عيانين
مِن غير حَيَا ومن غير خِشا
دول مش بشر دول ملعونين
..........................
واللي يشوف غيره اشتكى
وطلب حسنته بالبُكا
يبعِد كأنه هيتعَدَىَ
معَ إن كله من الزكا
........................
واللا اللي قاعده مُحجبه
تِخفِي الحلاوه والصِبا
وصاحِبنا باعِت بصِّته
نظرة جريئه مجرَّبه
..........................
بيجيبها فوقها لتحتها
مِن غير خجل أو تهتهه
والست بتحاول تحوش
نظرات مُسيئه لوشها
..........................
واللا اللي يحلِف ليل نهار
وعنيه تطقطق بالشرار
مع إنه صايم م السحر
غيَّر ضميره عشان دينار
...............................
يا ناس حرام ده كله عار
دى اللعنه تدخل أي دار
لو كانت الميه الصيام
فالمَيه تِمنع أى نار
.............................
نار الضغينه والغضب
نار الضمير اللي انقلب
نار الذنوب السيئه
للي شتم واللي ضَرَبْ
.............................
نِسْتنىَ ليلة قدْرِنا
اللي تزيد مِن قدرنا
يا رب حقق حِلمِنا
واقبل توبتنا وعذرنا
.............................
يا رب إغفِر ذنبنا
واقبل صمودنا وصبرنا
وافتح لنا باب الرجا
ندخل في طوعَك كلـِّنا
****************
السبت 5 سبتمبر 2009 - 5:09 من طرف زهرةالربيع
موضوع: هل الهـــلال 